Ýurdumyzyň futbol çempionatynyň iki aýlawynyň jemi boýunça geçiren 16 duşuşygynda toplan 24 utugy bilen ýaryş tertibinde 4-nji orny eýeleýän Türkmenbaşy şäheriniň «Şagadam» toparynyň baş tälimçisi wezipesine 73 ýaşly tejribeli hünärmen Aly Gurbany bellenildi. 

A.Gurbany bu wezipä Ýewgeniý Tkaçenkonyň ornuna bellenildi. Ýeri gelende bellesek, Ý.Tkaçenko indi toparda baş tälimçiniň kömekçisiniň wezipesini ýerine ýetirer.

Çempionatyň nobatdaky böleginiň öňüsyrasynda düzümini güýçlendirdi

Türkmenbaşy şäheriniň «Şagadam» topary Türkmenistanyň futbol çempionatynyň ikinji ýarymynyň öňýany düzümine ýerli çempionatymyzyň oýunçylarynyň birnäçesini goşdy. 

Ikitaraplaýyn gelnen ylalaşyga laýyklykda, möwsümiň ikinji aýlawynda Türkmenbaşy şäheriniň toparynda paýtagtymyzyň «Aşgabadynyň» oýunçylary Şatlyk Gurbanow, Didar Tejenow hem-de Hojanazar Gurbanow dagy çykyş eder. «Energetik» toparynyň derwezeçisi Muhammet Öwezow hem çempionatymyzyň ikinji ýarymyny Türkmenbaşy şäheriniň toparynda geçirer. 

Mundan başga-da, «Şagadam» topary geljegine umyt bildirilýän ýaş oýunçylaryň hem birnäçesini düzümine goşdy. 

Ýeri gelende bellesek, Türkmenbaşy şäheriniň «Şagadam» topary ýurdumyzyň futbol çempionatynyň iki aýlawynyň jemi boýunça geçiren 16 duşuşygynda toplan 24 utugy bilen ýaryş tertibinde 4-nji orny eýeleýär. 

Bu topar häzirki wagtda Türkiýäniň Kartepe şäherinde okuw-türgenleşik ýygnanyşygyny geçýär. Toparyň türgenleşik ýygnanyşygy 8-nji awgusta çenli dowam eder.

«Şagadam» topary üçin çempionat 21-nji awgustda badalga alar. Türkmenbaşy şäheriniň topary şol gün 20-nji tapgyryň çäginde «Nebitçi» topary bilen duşuşar.

26-njy iýulda Fransiýanyň paýtagtynda XXXIII tomusky Olimpiýa oýunlarynyň açylyş dabarasy boldy. Oňa Türkmenistanyň türgenleri hem gatnaşdylar. Bu barada TDH habar berýär.

Bellenilişi ýaly, 1896-njy ýylda fransuz jemgyýetçilik işgäri Pýer de Kuberten tarapyndan gaýtadan dikeldilen we her dört ýyldan bir gezek geçirilýän bu iri ýaryşlar Ýer ýüzüniň dürli künjeginden sport dünýäsiniň iň ezber wekillerini bir ýere jemleýär.
Türkmenistanyň Olimpiýa wekiliýetiniň düzümine 19 adam, şol sanda sportuň dört görnüşi — dzýudo, agyr atletika, suwda ýüzmek, ýeňil atletika boýunça çykyş edýän 6 türgen girýär.

Tomusky Olimpiýa oýunlarynyň taryhynda açylyş dabarasy ilkinji gezek stadionda däl-de, şäheriň merkezinde geçirildi. Dabara türgenleriň adaty bolmadyk ýörişi bilen başlandy: Olimpiýa oýunlaryna gatnaşyjylar Sena derýasynda gaýyklarda ýüzdüler. Wekiliýetleriň ýörişi Austerlis köprüsinde başlandy we olar gaýyklarda 6 kilometrlik ýoly geçip, Eýfel diňiniň öňündäki “Trokadero” meýdançasyna geldiler. Syýahatyň dowamynda türgenler Fransiýanyň paýtagtynyň gözel künjekleri: Notr-Dam, Luwr, Uly köşk, Pon-Nýof köprüsi we beýleki desgalar bilen tanyşmaga mümkinçilik aldylar.

Däbe görä, türgenleriň dabaraly ýörişini Olimpiýa oýunlarynyň watany bolan Gresiýanyň ýygyndy topary açdy. Pariž şäherinde geçirilýän Olimpiada gatnaşýan toparlaryň ählisi kenaryň ýakasynda gurnalan münberlere ýygnanan köp sanly tomaşaçylaryň öňünden geçdiler. Şolaryň arasynda Türkmenistanyň milli ýygyndysy hem bar. Toparyň baýdak göterijisi, dzýudo boýunça “Uly tuwulga” ýaryşynyň Türkmenistanyň taryhyndaky ilkinji çempiony S.Rahimow türkmen türgenleriniň hatarynyň öňüni çekdi. Ol şu ýylyň maýynda Täjigistanda geçirilen «Dushanbe Grand Slam — 2024» ýaryşynda 66 kilograma çenli agram derejesinde altyn medala mynasyp boldy. Indi bolsa oňa dört ýyldan bir gezek geçirilýän esasy sport ýaryşynda Türkmenistanyň milli ýygyndy toparynyň baýdak göterijisi bolmak ýaly jogapkärli wezipe ynanyldy.

Olimpiada — 2024-de Türkmenistana S.Rahimow bilen bir hatarda, dzýudoçy M.Pardaýewa (57 kilograma çenli), ýüzüjiler M.Žalaýew (100 metr aralyga erkin usulda), A.Primowa (100 metr aralyga arkanlygyna ýüzmek), agyr atletikaçy D.Hasanbaýew (102 kilograma çenli) we ýeňil atletikaçy W.Meredowa (100 metr aralyga ylgamak) wekilçilik edýärler. W.Meredowa türkmen wekiliýetiniň düzüminde Olimpiýa oýunlaryna ikinji gezek gatnaşýan ýeke-täk türgen bolup, ol ilkinji gezek 2008-nji ýylda Hytaýyň paýtagty Pekinde geçirilen Olimpiadada çykyş edipdi. Beýleki türgenler Olimpiýa oýunlarynda ilkinji gezek çykyş ederler.

«Türkmenistanyň ýygyndy toparynyň Pariždäki metbugat wekilleriniň habar berşi ýaly, türgenlerimiz ruhubelent we bäsleşige taýýar. Uzak aralyga garamazdan, olar watandaşlarynyň goldawyny duýýarlar. Çünki olar tutuş halkymyzyň agzybirlikde, watançylyk hyjuwy bilen özlerine üstünlik arzuw edýändiklerine ynanýarlar» diýlip, çeşmede bellenilýär.

Fransiýanyň paýtagtyndaky Olimpiýa oýunlary 11-nji awgustda tamamlanar.

«Ahal» futbol kluby Türkmenistanyň çempionatynyň ikinji ýarymynda medallar ugrunda göreşmek üçin pugta taýýarlyk görýär. Häzirki wagtda topar 16 oýunda toplanan 38 utuk bilen Türkmenistanyň çempionatynyň turnir tablisasynda üçünji ýeri eýeläp dur. Birinji orundaky «Arkadag» toparynda 48, ikinji ýerdäki «Altyn asyrda» bolsa 37 utuk bar.

Häzirki wagtda «Ahal» baş tälimçiniň wezipesini wagtlaýyn ýerine ýetiriji Welsähet Öwezowyň ýolbaşçylygynda Türkiýäniň Kartepe şäherçesinde okuw-türgenleşik ýygnanyşygyny geçirýär.

Toparyň ozalky halypasy Döwlet Annaýewiň Türkmenistanyň ýaşlar ýygyndysynyň (U-20) bäş tälimçiligine bellenilendigini ozal habar beripdik.

Toparyň metbugat gullugy birnäçe transfer täzeliklerini hem paýlaşdy. Hususan-da, toparyň düzümine «Aşgabatdan» Azat Amanow, «Nebitçiden» Magtymberdi Berenow gelip goşuldy. Şeýle-de «Ahal» we «Arkadag» toparlary özara derwezeçilerini çalyşdylar. Rahat Japarow «Ahala» dolanan bolsa, Rüstem Ahallyýew «Arkadag» toparyna geçdi. Şol bir wagtyň özünde «Ahal» iki oýunçysyny: Şyhdurdy Amandurdyýewi hem-de Orazaly Begnazarowy «Aşgabada» kärendesine berdi.

Türkmenistanyň çempionatynyň ikinji ýarymyna taýýarlygyň çäginde «Ahal» birnäçe ýoldaşlyk duşuşyklarynda hem meýdança çykar. Has takygy, 27-nji iýulda «Al-Safa» (Saud Arabystany), 1-nji awgustda «Fethiýespor» (Türkiýe), 4-nji awgustda «Al-Ahdoud» (Saud Arabystany) hem-de 7-nj awgustda «Gol Gohar» (Eýran) toparlary bilen ýoldaşlyk duşuşyklary geçiriler.

Bu ýoldaşlyk duşuşyklary tälimçilere toparyň ýakyn wagtda geçiriljek resmi oýunlara taýýarlygyny bahalandyrmaga mümkinçilik berer. Okuw-türgenleşik ýygnanyşygy 10-njy awgusta çenli dowam eder. Şondan soňra topar Türkmenistana dolanar hem-de Ýokary liganyň 19-njy tapgyrynyň çäginde «Energetik» bilen boljak oýna taýýarlanyp başlar. Bu oýun 17-nji awgustda geçiriler.

Şol bir wagtyň özünde, «Ahalyň» düzüminde saglygyny dikeltmegi dowam etdirýän birnäçe şikesli oýunçylar bar. Olar Döwran Hojamämmedow, Igor Sekow hem-de Akmämmet Metdäýewdir.

Parižde 33-nji tomusky Olimpiýa oýunlarynyň açylyş dabarasy bolar. 10,5 müňden gowrak türgeniň gatnaşjak Olimpiadasy 11-nji awgustda tamamlanar. Bu guramaçylyk üçin Fransiýa hökümeti 8,3 milliard ýewro möçberinde çykdajy etdi.

Pariž 3-nji gezek guraýar
Tomusky Olimpiýa oýunlary 3-nji gezek Parižde geçirilýär. Pariž şäheri Londondan soň Olimpiýa oýunlaryny 3 gezek guran 2-nji şäher bolar. Mundan öň 1900-nji hem-de 1924-nji ýyllarda Parižde tomusky Olimpiýa oýunlary geçirilipdi. Umumylykda bu Fransiýanyň 6-njy Olimpiýa oýunlary bolup, 1924-nji ýylda Şamoni, 1968-nji ýylda Grenoble hem-de 1992-nji ýylda Alberwil şäherlerinde gyşky Olimpiýa oýunlary hem geçirilipdi.

Breýkdans – ilkinji gezek maksatnamada
33-nji tomusky Olimpiýa oýunlarynda umumylykda 32 sport görnüşi bolup, olaryň diňe biri ilkinji gezek Olimpiadanyň maksatnamasynda bolar. Ol hem breýkdans sporty bolup, ol köçe medeniýetini, tans sungatyny özünde jemleýär.

Talismanlar – Frižler

Şu Olimpiadanyň hem-de Paralimpiadanyň nyşany, timary Frižler bolup, ol Frigiýa şyrdagynyň şekilindedir. Ol erkinligi, azatlygy aňladýar. Olimpiýa oýunlarynyň tumary ak aýakgapda bolsa, Paralimpiýa oýunlarynyň nyşanynyň bir aýagy protez aýakdyr.  

Marafona hemmeler gatnaşyp biler, medallarda Eýfelden ýadygärlik
Olimpiýa oýunlarynyň taryhynda ilkinji gezek marafon ylgawyna professional däl türgenler hem gatnaşar. Professional türgenler irräk başlar we soňlugy bilen ýaryş zolagy hemmelere açylar. Olimpiýa oýunlarynyň çäginde gowşuryljak 5084 medalyň ählisine-de Eýfel diňinden bir bölejik ýerleşdirildi.   

Açylyş Sena derýasynda geçiriler
Açylyş dabarasy Sena derýasynda geçiriler. Ol ep-esli tomaşaçyny kabul ediler. Şeýle-de, kenarýaka woleýbol duşuşyklary Eýfel diňiniň aşagyndaky Mars meýdançasynda, breýkdans, 3x3 basketbol, BMX fristaýl, skeýtboarding sportlary Konkord meýdançasynda, gylyçlaşmak we taekwondo Gran Palede geçirilse, marafon ylgawy De Wil myhmanhanasynyň deňinden start alar.  

Bu Olimpiada diňe bir türgenler üçin däl, eýsem, şäheriň we onuň myhmanlary üçinem uly baýramçylyga öwrüler.

Angliýanyň «Mançester Ýunaýted» toparynda ýolbaşçylaryň üýtgemeginden soň, klubuň transfer syýasaty hem üýtgeýär. Toparyň futbol paýnamalaryny satyn alan Jim Retkliff käbir oýunçylaryň klubdan gitmegini isleýär. Golaýda tälimçi Erik ten Hag bilen şertnamasynyň möhleti uzaldan klubda häzirki wagtda 5-6 futbolça klub gözlenip başlandy. Transfer möwsüminde 2 sany ýaş futbolçyny – Leni Ýorony hem-de Joşua Zirkzeeni transfer eden klubdan gitjek oýunçylaryň sanawyny «ESPN» mälim etdi.

Şoňa görä, Antoni, Skot MakTomineý, Wiktor Lindelöf, Aaron Wan Bissaka, Kristian Eriksen, Garri Maguaýr dagyny klubdan ugratmakçy bolýarlar. Amatly teklip gelen ýagdaýynda, hepdede 360 müň funt sterling hak alýan braziliýaly oýunçy Kazemiro hem transfere goýberilip bilner. Klubuň eýesi Gleýzerleriň maşgalasynyň, esasan hem, Wan Bissaka hem-de Lindelöfiň klubdan gitmegini isleýändigi habarda nygtalýar.

Parižde geçirilýän Olimpiýa oýunlarynyň dzýudo boýunça ýaryşyna bije çekildi. Bijä laýyklykda, türkmen dzýudoçylarynyň garşydaşlary belli boldy.

Olimpiýa oýunlarynda Türkmenistana 2 dzýudoçy wekilçilik edýär. Olar 20 ýaşly Serdar Rahymow (66 kilograma çenli agram dereje) hem-de 19 ýaşly Maýsa Pardaýewadyr (57 kilograma çenli agram dereje).

Bijäniň netijeleri:

Erkekler:

• 28-nji iýul, 66 kilograma çenli agram dereje
• Birinji aýlaw: Serdar Rahymow (Türkmenistan) – Edmilson Pedro (Angola)

Zenanlar:

• 29-njy iýul, 57 kilograma çenli agram dereje
• Birinji aýlaw: Maýsa Pardaýewa (Türkmenistan) – Ki Kaý (HHR)

Ýeri gelende bellesek, Pariž-2024-iň dzýudo ýaryşyna 122 ýurtdan 378 türgen gatnaşýar.

Özbegistanyň ýygyndysynyň hüjümçisi Eldor Şomurodow Parižde geçirilýän Olimpiýa oýunlarynyň futbol ýaryşynyň toparçalaýyn tapgyrynyň çäklerinde Ispaniýa bilen bolan oýunda taryhy goluň awtory boldy. Hüjümçi birinji ýaryma emin tarapyndan goşulan 3-nji minutda penaltini dürs ýerine ýetirip, Özbegistanyň Olimpiýa oýunlaryndaky ilkinji goluny öz adyna ýazdyrdy.

Eldor Şomurodowyň urgusy bilen hasaby deňländigine garamazdan, Özbegistan 1:2 hasabynda garşydaşyndan asgyn geldi. Pariž şäherindäki «Park de Prens» stadionynda geçirilen oýunda ispanlaryň düzüminde Mark Pubil we Serhio Gomes tapawutlandylar.

Ýeri gelende bellesek, «С» toparçada Özbegistan bilen Ispaniýadan başga Müsüriň hem-de Dominikan Respublikalarynyň hem ýygyndylary bar. Özbegistan indiki duşuşygynda 27-nji iýulda Müsür bilen güýç synanyşar. Nant şäherinde boljak oýun Aşgabat wagty bilen sagat 20:00-da başlanar.

Maglumat üçin, Olimpiýa oýunlarynyň futbol ýaryşy 24-nji iýulda başlanyp, 10-njy awgusta çenli dowam edýär.

Türkmen türgenleri XXXIII Tomusky Olimpiýa oýunlaryna gatnaşmak üçin Pariže geldiler. Türkmen wekiliýeti fransuz paýtagtynyň demirgazyk böleginde ýerleşýän Olimpiýa şäherjiginiň onunjy gatynda ýerleşdirildi. Olimpiýa däbine görä, topar milli baýdagyny we "Team Turkmenistan" ýazgyly bannerini penjiresine asdy.

Türkmenistanyň ýygyndy topary dört sport görnüşinde alty türgen bilen çykyş eder: dzýudo, suwda ýüzmek, ýeňil atletika we agyr atletika. Olimpiýadanyň resmi açylyşy 26-njy iýulda bolar.

Türkmen türgenleriniň çykyşlarynyň tertibi:

• 28-nji iýul, 13:00: Dzýudo (66 kg çenli), 1/32 final – Serdar Rahymow
• 29-njy iýul, 14:00: Dzýudo (57 kg çenli), 1/32 final – Maýsa Pardaýewa
• 29-njy iýul, 14:00: Suwda ýüzmek (100 m arkalaýyn), deslapky ýüzüşler – Aýnura Primowa
• 30-njy iýul, 14:00: Suwda ýüzmek (100 m erkin usul), deslapky ýüzüşler – Musa Žalaýew
• 2-nji awgust, 13:35: Ýeňil atletika (100 m), deslapky ýüzüşler – Walentina Meredowa
• 10-njy awgust, 14:30: Agyr atletika (102 kg çenli) – Dawranbek Hasanbaýew

Ähli ýaryşlary Halkara Olimpiýa Komitetiniň web saýtynda görmek bolar.

Oş şäheriniň "Alaý" topary türkmenistanly futbolçy Süleýman Muhadow bilen şertnama baglaşandygyny yglan etdi.

"Hoş geldiň, Süleýman!" - diýip, klubyň metbugat gullugynyň beýanatynda aýdylýar.

30 ýaşly hüjümçiniň täze şertnamasy şu möwsümiň soňuna çenli hereket eder.

Ozal Muhadow Kant şäheriniň "Abdyş-Ata" toparynda çykyş edipdi. Mundan başga onuň "Altyn asyr", "Ahal", "Istiqlol", "Hudžand", "CSKA" we "Dordoý" ýaly toparlaryň düzüminde çykyş eden tejribesi bar.

Häzirki wagtda "Alaý" Gyrgyzystan Premýer-Ligasynda 4-nji orny eýeleýär. Toparyň 15 oýunda 26 utugy bar. Turnir tablisasynyň birinjiligini "Abdyş-Ata" (39 utuk) eýeleýär, ondan soň "Dordoý" (37) we "Muras Ýunaýted" (26) gelýär.

Aşgabat şäheriniň bedenterbiýe we sport baradaky Baş müdirliginiň sport mekdepleri täze 2024-2025-nji okuw ýyly üçin sportuň görnüşleri boýunça 5 — 13 ýaş aralygyndaky çagalary türgenleşiklere çagyrýar. Baş müdirlige degişli sport mekdepleriniň 16-synda sportuň dürli görnüşleri boýunça talim berilýär. Çagalar 2024-nji ýylyň iýul-awgust aýlarynda kabul edilýär.

Mekdeplerde hereket edýän ugurlar boýunça has giňişleýin maglumaty şu salgy boýunça ýükläp bilersiňiz.

Türkmenistanyň sport wekiliýeti 26-njy iýul – 12-nji awgust aralygynda geçiriljek XXXIII tomusky Olimpiýa oýunlaryna gatnaşmak üçin şu gün Stambulyň üsti bilen Aşgabatdan Pariže geldi.

Halkara Olimpiýa komitetiniň howandarlygynda her dört ýyldan bir gezek geçirilýän bu köpugurly ýaryşlar ýer ýüzüniň iň gowy türgenlerini bir ýerde jemlemek bilen, dünýäde ýokary gyzyklanma döredýär.

Sportuň ösmegine ägirt uly üns berýän Türkmenistan Olimpiýa oýunlaryna wekiliýetini sekizinji gezek iberýär. Häzirki wekiliýetiň düzüminde 19 adam, şol sanda 6 türgen bar. Biziň türgenlerimiz sportuň dört görnüşi – dzýudo, agyr atletika, suwda ýüzmek we ýeňil atletika boýunça gatnaşar.

Dünýäniň iň uly parahatlyk forumynda Türkmenistan tarapyndan dzýudoçy Serdar Rahymow (agram topary 66 kg çenli), Maýsa Pardaýewa (57 kg çenli), agyr atletikaçy Dawranbek Hasanbaýew (102 kg çenli), ýüzüjiler Musa Jalaýew (erkin stilde 100 metr), Aýnur Pirimowa (arkanlygyna 100 metr) we ýeňil atletikaçy Walentina Meredowa (100 metre ylgama) dagy gatnaşar. Ýeri gelende aýtsak, ol 2008-nji ýylda Pekinde (Hytaý) geçen oýunlara ilkinji gezek gatnaşanyndan soň, wekiliýetimizden Olimpiada ikinji gezek gatnaşýan ýeke-täk türgendir. Galan türgenler Olimpiýa oýunlarynda ilkinji gezek çykyş ederler.

Eýsem-de bolsa, toparymyzdaky ilkinji gezek çykyş edýänleriň arasynda eýýäm dünýä sportunda tanalýan türgenleriň bardygy bellemäge mynasypdyr. Bu, ilkinji nobatda, dzýudo boýunça Türkmenistanyň taryhynda ilkinji Uly tuwulga çempiony, «Dushanbe Grand Slam 2024» ýaryşynda 66 kg çenli agram toparynda altyn medala mynasyp bolan Serdar Rahymow we Hançžouda geçen XIX tomusky Aziýa oýunlarynyň we Türkiýede geçen «Antalya Grand Slam 2024» Uly tuwulga ýaryşynyň bürünç medalçysy Maýsa Pardaýewadyr (57 kg çenli).

Üç ýyl mundan öň Tokioda geçen Olimpiýa oýunlarynda türkmenistanly türgenler ýurdumyzyň taryhynda ilkinji gezek kümüş medal gazanypdylar. Oňa 59 kg çenli agram toparyndan agyr atletikaçy Polina Gurýewa mynasyp bolupdy.

Türkmenistanyň wekilleri ýakynda Parižde geçiriljek Olimpiadada bulardan has ýokary derejeler gazanmak bilen, watanymyzyň sport abraýyny mümkingadar ýokary galdyrmagy niýet edinýärler. Türkmenistanyň döwlet syýasaty derejesine galdyrylan olimpiýa hereketini, köpçülikleýin bedenterbiýäni we ýokary derejeli sporty mundan beýläk-de ösdürmek meselesine hormatly Prezidentimiz Serdar Berdimuhamedowyň we türkmen halkynyň Milli Lideri Gahryman Arkadagymyzyň hut özleriniň gatnaşmagy muňa umyt baglamaga esas berýär.

Pariže ugramaklarynyň öňýany Aşgabadyň Olimpiýa şäherçesinde türkmen türgenlerini XXXIII tomusky Olimpiýa oýunlaryna dabaraly ugradyş çäresi bolup geçdi. Bu çäre halky has-da jebisleşdirdi we olimpiadaçylaryň belent ruhuna ruh goşdy.

Beýik britaniýaly meşhur tennisçi Endi Mýurreý karýerasyny tamamlamagyň bosagasynda dur. Ol iň soňky bäsleşigi üçin Pariže gelendigini tassyklap, tomusky Olimpiýa oýunlaryndan soň tennis bilen hoşlaşjakdygyny aýtdy. 5-nji gezek Olimpiýa oýunlaryna gatnaşýan 37 ýaşyndaky tennisçi karýerasy boýunça 45 ýaryşda ýeňiş gazanyp, bu ugurda «Açyk» döwrüň 15-nji tennisçisidir. Tennis ýaryşlaryndan 65 million dollara golaý pul baýragyny gazanan Mýurreý bu babatda 4-nji ýeri eýeleýär.

Rojer Federer, Rafael Nadal hem-de Nowak Jokowiçiň kölegesinde galan Mýurreý 3 «Uly tuwalga» kubogyny gazandy. «Uimbldonda» 2 (2013, 2016) hem-de Amerikanyň Açyk çempionatynda» (2012) çempion bolan Mýurreýe «Awstraliýanyň we Fransiýanyň Açyk çempionatlarynda ýeňiş gazanmak başartmady. Ol «Fransiýa Açykda» 1, «Awstraliýa Açykda» bolsa 5 gezek finalda ýeňildi.

Ussat tennisçi tomusky Olimpiýa oýunlarynda 2 gezek çempion bolmagy başardy. Pariž 2024-e gatnaşmak bilen 3-nji altyn medalyna ymtylýan Mýurreý 2012-nji we 2016-njy ýyllarda Olimpiýa oýunlarynyň çempiony bolmagyň hötdesinden geldi. Ol 2012-nji ýylda Londonda jübütleýin ýaryşda kümüş medal hem gazandy.