Türkmenistanyň ýygyndysy Özbegistanyň Daşkent şäherinde 17 ýaşa çenli ýetginjek oglanlaryň arasynda geçirilýän Merkezi Aziýanyň Futbol assosiasiýasynyň (MAFA) çempionatyna gatnaşýar.

Şu gün MAFA-nyň U-17 çempionatynyň toparçalaýyn tapgyryna bije çekildi. Oňa laýyklykda, Türkmenistanyň ýygyndysy Owganystan we Täjigistan bilen bilelikde «B» toparçadan orun aldy. «A» toparçada bolsa ýer eýesi Özbegistanyň, Eýranyň we Gyrgyz Respublikasynyň ýygyndylary özara güýç synanyşarlar.

MAFA-nyň U-17 çempionaty 24-nji maýda başlap, 31-nji maýa çenli dowam eder.

Aýlaw görnüşinde geçirilýän ýaryşyň toparçalaýyn tapgyrynda Türkmenistanyň ýygyndysy 24-nji maýda Owganystan, 26-njy maýda bolsa Täjigistan bilen duşuşar. Toparçalarda birinji ýeri eýelän ýygyndylar finalda sebitiň çempionyny kesgitlärler. Ikinji ýeriň eýeleri bürünç medal üçin, toparçada üçünji orny eýelänler bolsa turniriň bäşinji orny üçin özara duşuşyk geçirerler.

Aşgabatda «C» derejäni almak üçin tälimçilik okuwlarynyň ikinji moduly dowam edýär – diýip, Türkmenistanyň Futbol federasiýasy habar berýär.

Okuw paýtagtymyzyň «Köpetdag» stadionynda 20 diňleýjiniň gatnaşmagynda geçirilýär. Okuwlaryň birinji moduly 25-29-njy aprelde amala aşyrylyp, ikinjisi şu ýylyň 19-23-nji maýy aralygynda geçirilýär.

Sapaklary FIFA-nyň we Türkmenistanyň Futbol federasiýasynyň (TFF) instruktory Röwşen Meredow geçirýär, onuň kömekçileri bolsa futbol tälimçileri Boris Borowik, Begenç Garaýew we Eziz Annamuhammedow.

Okuw maksatnamasy nazary we amaly sapaklary öz içine alýar. Okuwyň soňunda diňleýjiler synaglary tabşyrmaly bolarlar, olary üstünlikli geçenler «C» derejeli tälimçilik sertifikatlaryna eýe bolanlar. Bu derejeli sertifikat 6-12 ýaş toparyndaky çagalar toparlary bilen işlemäge hukuk berýär.

Dört ýeňiş, bir ýeňliş we ikinji ýer – Türkmenistanyň milli ýygyndysynyň hokkeýçileriniň Türkiýäniň Stambul şäherinde geçirilen IIHF hokkeý boýunça dünýä çempionatynda «A» toparyň üçünji bölüminde altynjy derejede eden çykyşynyň netijesi, ine şeýle.

«B» toparyň has güýçli, ikinji bölümine düşmek üçin ýeke-täk mümkinçilik ugrunda Stambulyň «Zeýtinburnu» sahnasynda geçen bu ýaryşda Bosniýa we Gersegowinanyň, Lýuksemburgyň, Gyrgyzystanyň, Türkiýäniň, Günorta Afrikanyň we Türkmenistanyň toparlary bäsleşdi.

Türkmen hokkeýçileri ýaryşa üstünlikli başladylar. Olar birinji tapgyrda bosniýa-gersegowinaly garşydaşlaryny 3:1 (1:1, 0:0, 2:0) hasabynda ýeňdiler, ikinji tapgyrda ýer eýelerini – türk toparyny 2:1 (1:1, 1:0, 0:0) hasabynda utdylar, üçünji tapgyrda bolsa Lýuksemburgyň toparyny uly ýeňlişe sezewar etdiler 8:3 (1:1, 0:1, 7:1) hasabynda.

Gyrgyzystanyň, Türkmenistanyň we Türkiýäniň ýygyndy toparlarynyň birinji ýer ugrundaky ýaryşyň ykbaly soňky iki tapgyrda çözüldi. Olaryň iň soňkusynyň öňýanynda ildeşlerimiz Gyrgyzystanyň hokkeýçileri bilen duşuşdy. Olaram öň, yzly-yzyna Günorta Afrikanyň, Lýuksemburgyň we Bosniýa-Gersegowinanyň toparlaryny, degişlilikde 5:2 (2:1, 2:0, 1:1), 6:0 (0:0, 3:0, 3:0), 5:1 (2:0, 1:0, 2:1) hasabynda utup, üç ýeňiş gazanypdylar.

Geçen ýyl Türkmenistanyň we Gyrgyzystanyň ýygyndy toparlary Bişkekde geçirilen dünýä çempionatynda-da oýnapdylar. Şonda ýeňiş gyrgyzlara hemra bolupdy – 7:5 (2:1, 2:2, 3:2) hasabynda.

Ikinji bäsleşik-de türkmen hokkeýçileri üçin aňsat bolmady, munda-da üstünlik gyrgyz toparynyň tarapynda boldy – 8:1 (4:0, 3:1, 1:0) hasabynda. Türkmenistanyň toparyndan ýeke-täk şaýbany 35-nji minutda oýun 0:6 hasabyndaka, Pawel Barkowskiý tora girizdi.

Jemleýji tapgyrda biziň hokkeýçilerimiz dünýä çempionatynda eýýäm üç gezek oýnan Günorta Afrika Respublikasynyň topary bilen duşuşdy. Iki duşuşykda türkmen topary ýeňdi: 2019-njy ýylda Sofiýada geçen dünýä çempionatynda – 7:2, 2024-nji ýyldaky Bişkekde geçen dünýä çempionatynda – 4:3 hasabynda. Diňe 2023-nji ýylda Keýptaun şäherinde geçirilen dünýä çempionatynda Günorta Afrika Respublikasynyň topary üstünlik gazandy – 4:3 hasabynda.

Günorta Afrika Respublikasynyň topary bilen dördünji duşuşyk üçünji döwürde 2:5 hasabynda ýeňlip barýan türkmen hokkeýçileri üçin çynlakaý synag boldy, ýöne olar duşuşygyň tamamlanmagyna bir sekunt wagt galanda, hasaby deňläp, goşmaça wagtda bolsa ýeňiş şaýbasyny tora salmak bilen, duşuşygyň ykbalyny tersine öwürdiler – 6:5 hasabynda. Türkmenistanyň toparynda Baýmyrat Baýmyradow (1-nji we 14-nji minut) we toparyň kapitany Amangeldi Aganyýazow (44-nji we 60-njy minutlar) dagynyň hersi iki şaýba saldy. Esasy wagtda Pawel Barkowskiý (44-nji) tapawutlandy, ýeňiş şaýbasyny bolsa goşmaça wagtda Kerwen Baýlyýew (62-nji) tora saldy.

Ýaryşyň iň soňky duşuşygynda Gyrgyzystanyň topary tutanýerli göreşde türk toparyny 3:1 (1:0, 1:1, 1:0) hasabynda utdy we 15 utuk bilen birinji orny eýeläp, ýokary topara geçmäge hukuk gazandy – 2026-njy ýylda «B» toparyň ikinji bölüminde dünýä çempionatyna gatnaşmaga ilkinji gezek hukuk gazandy.

Ikinji ýeri 11 utuk toplan türkmen topary eýeledi, baýrak gowşurylyş dabarasynda olara kümüş medallar gowşuryldy. 3-nji ýer üçin bürünç medala 9 utuk toplan türk topary mynasyp boldy. Bu topara üç ýyldan gowrak wagtlap sloweniýaly hünärmen Andreý Brodnigiň ýolbaşçylyk edendigini, Türkmenistandan we Gyrgyzystandan utulanlaryndan soň, işden çykarylandygyny bellemek gerek.

3 utuk bilen iň soňky orny eýelän Lýuksemburgyň topary derejede peseldilip, üçünji bölümiň «B» toparyna geçirildi. Geljek ýyl üçünji bölümiň «A» toparynda olary Meksikanyň ýygyndy topary çalşar. Ol şu aýda öz watany Santýago-de-Keretaro şäherinde geçirilen 2025-nji ýyldaky dünýä çempionatynda «B» toparyň üçünji bölüminiň toparlarynyň arasynda gonkongly (5:2), filippinli (9:1), Singapurly (18:1), mongoliýaly (7:6) we demirgazyk koreýaly garşydaşlaryny (9:2 hasabynda) ýeňlişe sezewar edip, üstünlik gazandy.

Geçen ýyl Bişkekde geçirilen dünýä çempionatynda türkmen topary üçünji bölümiň «A» toparynda 4-nji ýeri eýeledi. Indi bolsa hokkeý boýunça toparymyz iki basgançak ýokary galdy. Topary bu üstünlige baş tälimçi Ylýas Weliýew alyp geldi, oňa ýygyndy topar bilen işleşmekde Guwanç Jepbarow kömek etdi.

Stambul şäherinde geçirilen dünýä çempionatynda Türkmenistanyň milli ýygyndysynda 19 hokkeýçiniň oýnandygyny, olaryň 12-siniň Türkmenistanyň Içeri işler ministrliginiň «Galkan» toparyna, 5-siniň Türkmenistanyň Söwda we daşary ykdysady gatnaşyklar ministrliginiň «Şir» toparyna, galan 2-siniň bolsa «Türkmengaz» döwlet konserniniň «Oguzhan», we «Türkmenaragatnaşyk» agentliginiň «Alparslan» toparlaryna degişlidigini ýatladýarys.

Türkmenistanly türgenler Özbegistanda geçirilýän suwda ýüzmek boýunça Merkezi Aziýanyň I açyk çempionatyna gatnaşýarlar. 19-njy maýda badalga alan bu ýaryş Özbegistanyň Suw sporty federasiýasy hem-de Kärdeşler arkalaşyklarynyň federasiýasy tarapyndan bilelikde guraldy diýip, uza.uz saýty ýazýar.

Merkezi Aziýanyň I açyk çempionatynda Türkmenistanyň, Özbegistanyň, Gazagystanyň, Gyrgyzystanyň we Täjigistanyň wekilleri suwda ýüzmegiň dürli görnüşleri we dürli aralyklary boýunça 158 sany medallar toplumy üçin özara güýç synanyşarlar.

23-nji maýa çenli dowam etjek ýaryşa sebitiň ýurtlaryndan jemi 168 türgen gatnaşýar.