Türkmenistanyň «Arkadag» topary bilen Eýranyň «Gol Gohar» topary AFK-2 Çempionlar ligasynyň toparçalaýyn tapgyrynyň üçünji oýnunda 0:0 hasabynda deňme-deň oýnadylar. Duşuşyk Täjigistanyň Hisar şäherinde geçirildi. Eýranyň kluby bu ýaryşdaky öz meýdançasynda kabul etmeli duşuşyklaryny şol şäherde geçirýär.

Duşuşykda toparlaryň hiç biri-de hasaby açmagy başarmady. Birinji ýarymda «Arkadag» has howply hüjümleri gurady. 27-nji minutda goragçy Arzuwguly Sapargulyýew 25 metr aralykdan çep aýagy bilen güýçli urgy geçirdi, emma «Gol Goharyň» derwezeçisi Farzin Garusian topy gaýtarmagy başardy. Dört minutdan soň Sapargulyýew ýene bir gezek derwezä urgy geçirdi, ýöne top derwezäniň ýokarysyndan geçdi.

Duşuşygyň ikinji ýarymynda türkmen toparynyň hasaby açmak üçin birnäçe amatly pursat boldy. 71-nji minutda Meýlis Diniýew jerime urgusyndan soň kelle bilen topy derwezä gönükdirdi, emma top derwezäniň ýokarysyndan geçdi. Az salymdan Rahman Myratberdiýew ýakyn aralykdan urgy geçirdi, ýöne Garusian derwezäniň çyzygynda topy saklady.

Üç tapgyryň netijeleri boýunça «Arkadag» dört utuk toplady, «Gol Goharyň» hasabynda bolsa iki utuk bar. Toparlaryň jogap duşuşygy 4-nji noýabrda Türkmenistanda geçiriler. Soňra türkmen kluby 25-nji noýabrda myhmançylykda Bahreýniň «Al-Muharrak» topary bilen, 9-njy dekabrda bolsa öz meýdançasynda Birleşen Arap Emirlikleriniň «Al-Jazira» topary bilen duşuşar.

Ýaryşyň 1/8 final tapgyryna her toparçadan iň gowy netije görkezen iki topar çykar.

Azerbaýjanda geçirilýän Halkara futbol federasiýasynyň (FIFA) 15 ýaşa çenli futbolçylaryň arasyndaky dünýä çempionatynda we futbol festiwalynda Türkmenistanyň ýaşlar ýygyndysy D torunyň 1/16 final tapgyrynda Kanadanyň ýygyndysyndan ýeňildi. Gowsan şäherinde geçirilen duşuşyk kanadalylaryň 4:0 hasabyndaky ýeňşi bilen tamamlandy.

Toparçalaýyn tapgyrda türkmen futbolçylary bäş duşuşyk geçirdiler. Olar Gonkongyň (2:1) we Kuk adalarynyň (3:1) ýygyndylaryny ýeňdiler, emma Italiýanyň (1:5), Kataryň (0:4) we Beniniň (1:4) ýygyndylaryndan asgyn geldiler. Türkmenistanyň ýygyndysy L toparynda dördünji orny eýeläp, 97–128-nji orunlar ugrunda göreşilýän D toruna düşdi.

Ýaryşyň düzgünnamasyna laýyklykda, ýeňlen toparlar ýaryşdan çykarylmaýar, eýsem, özleri ýaly ýeňlişe sezewar bolan garşydaşlary bilen duşuşyklaryny dowam etdirýärler. A–F aralygyndaky alty toruň her birinde ýeňiji bolan toparlar öz diwizionlarynyň ýeňijileri diýlip yglan ediler. Ýaryşyň umumy çempiony bolsa A torunda iň gowy netije görkezen topar bolar.

Türkmenistanyň ýygyndysynyň indiki garşydaşy Siriýanyň ýygyndysy bolar. Siriýalylar 1/16 final tapgyrynda Andorradan 1:2 hasabynda ýeňildiler.

Ýaryşyň duşuşyklary kiçeldilen ölçegdäki meýdançalarda 8×8 görnüşinde geçirilýär. Toparlar her biri 20 minut dowam edýän iki taým oýnaýarlar. Her bir ýygyndy ýaryşyň dowamynda azyndan 10 duşuşyk geçirer. Bäsleşik 31-nji oktýabrda tamamlanar.

Türkmenistana wekilçilik edýän «Ahal» futbol kluby 2026/27-nji möwsümdäki AFK-nyň Çagyryş ligasynda toparçalaýyn tapgyrdan çykyp bilmän, ýaryşdaky çykyşyny tamamlady. Türkmenistanyň wise-çempiony üç duşuşykda dört utuk toplap, Günbatar zolagynyň «A» toparçasynda üçünji orny eýeledi.

Türkmen kluby ýaryşy Butanyň «Paro» topary bilen deňme-deň oýnamak bilen (2:2) başlady. Ikinji tapgyrda Eziz Annammuhammedowyň tälim berýän topary Siriýanyň «Al-Ittihad» klubyndan uly hasap bilen ýeňildi (1:5). Jemleýji duşuşykda bolsa Liwanyň «Al-Ansar» toparyny 2:1 hasabynda ýeňip, toparçanyň liderine ýaryşdaky ilkinji gezek ýeňilmeklige sezewar etdi. Ýeňiş gazanylan duşuşykda Begenç Mämiýew we Ýakupmuhammet Gowşudow tapawutlandylar.

Üç tapgyryň netijeleri boýunça «Al-Ansar» bilen «Al-Ittihad» toparlarynyň hersi alty utuk toplady, «Paro» toparynyň hasabynda bolsa bir utuk bar. Günbatar zolagyndan çärýek finala toparçalaryň üç ýeňijisi we ikinji orny eýelän toparlaryň arasynda iň gowy netije görkezen klub çykýar. Şonuň üçin üçünji orny eýelän «Ahal» ýaryşdaky göreşini dowam etdirip bilmedi.

«Ahaldan» başga-da Merkezi Aziýanyň ýene dört kluby ýaryşa gatnaşdy, emma olaryň hiç biri çärýek finala çykyp bilmedi. Gyrgyzystanyň «Dordoý» we «Muras Ýunaýted» toparlary saýlama tapgyrynda ýaryşdan çykdylar. «Dordoý» Siriýanyň «Homs Al-Fida» toparyndan penalti urgulary boýunça ýeňildi, «Muras Ýunaýted» bolsa Bangladeşiň «Fortis» klubundan 0:1 hasabynda asgyn geldi.

Täjigistanyň «Istiklol» we «Regar-TadAZ» toparlary toparçalaýyn tapgyry üç utuk bilen tamamladylar. «Istiklol» «Homs Al-Fida» toparyndan 0:2 hasabynda ýeňildi, «Regar-TadAZ» bolsa «Fortis» toparyndan 1:3 hasabynda asgyn geldi. Şeýlelikde, «Ahal» sebit klublarynyň arasynda iň köp gol geçiren topar boldy.

AFK-nyň Çagyryş ligasy Aziýanyň klub futbolyndaky ähmiýeti boýunça AFK-nyň Elita Çempionlar ligasyndan we AFK-2 Çempionlar ligasy ýaryşyndan soň üçünji orunda durýar. Bu ýaryş futboly ösüp barýan ýurtlaryň futbol birleşiklerine wekilçilik edýän klublar üçin döredildi.

Ýaryşyň 2024/25-nji möwsümdäki ilkinji çempiony «Arkadag» kluby boldy. Ol Pnompen şäherinde geçirilen finalda Kambojanyň «Prea Han Riç Swai Rieng» toparyny goşmaça wagtda 2:1 hasabynda ýeňdi. 2025/26-njy möwsümde bolsa kubogy Kuweýtiň «Al-Kuweýt» kluby gazandy. Häzirki möwsümiň final duşuşygyny 2027-nji ýylyň 8-nji maýynda geçirmek meýilleşdirilýär.

Türkmenistanyň agyr atletika boýunça milli ýygyndysy 2026-njy ýylyň 27-nji oktýabryndan 8-nji noýabry aralygynda Hytaýyň Ninbo şäherinde geçiriljek 91-nji dünýä çempionatyna gatnaşar. Ýaryşa gatnaşjak türgenleriň sanawyna 10 türgen girizildi.

Milli ýygyndynyň düzümi.

Zenanlar:

• Anamjan Rustamowa (86 kilograma çenli)

• Gülälek Kakamy­radowa (77 kilograma çenli)

• Medine Amanowa (69 kilograma çenli)

• Şabnam Kerimbaýewa (57 kilograma çenli)

• Ogulşat Amanowa (53 kilograma çenli)

Erkekler:

• Şahzadbek Mätýakubow (110 kilograma çenli)

• Rüstem Annaberdiýew (95 kilograma çenli)

• Gaýgysyz Töräýew (85 kilograma çenli)

• Didarbek Jumabaýew (75 kilograma çenli)

• Bektimur Reýimow (75 kilograma çenli)

Ninbo şäherinde geçiriljek 2026-njy ýylyň dünýä çempionaty agram derejeleriniň ulgamyna girizilen üýtgetmelerden soň geçirilýän ilkinji dünýä çempionaty bolar. Ýaryşda erkekleriň we zenanlaryň arasynda sekiz agram derejesi boýunça jemi 16 toplum medal ugrunda göreşiler. Bu ýaryş 2028-nji ýylda Los-Anželesde geçiriljek tomusky Olimpiýa oýunlaryna saýlama ýaryşy bolup hyzmat eder. Hytaý agyr atletika boýunça dünýä çempionatyny ikinji gezek kabul edýär. Hytaý bu ýaryşy ilkinji gezek 1995-nji ýylda geçiripdi.